الشبح يوضح :ثقافة الدبح ف الشارع من مصلحة الجزار دايما وضد صحتك أنت

كتير مننا بيشوف أو حتى بيشتري من جزار دابح الدبيحة في الشارع من غير سلخانة ولا غيره

وفيه ناس بتدافع عن الثقافة دي على أساس إنهم اتربو على كده وبياكلو أجمل وأطعم لحمة بالطريقة دي

والغريبة كمان إن بيكون فيهم متعلمين وعلى درجة عالية من الثقافة وحجتهم إن الدبيحة كانت سليمة وزي الفل قبل ماتندبح قدام عنيهم 

طب ما تيجو نتناقش بالعقل والمنطق 

أولا : ليه الحكومة عملت المجازر ؟

الإجابة طبعاً علشان يتم دبح الحيوانات المصرح بيها في مكان مجهز ومخصص تحت اشراف طبي لضمان وصول لحوم صحية للمواطنين

طيب هل الشارع مجهز للدبح ؟

الإجابة : أكيد لا 

ده كفاية بس التلوث والروايح و مخلفات الذبيح اللي بتغرق الشارع وبتلم الحشرات والقوارض 

ثانياً: هل المنطقة أو القرية فيها مجزر ؟

طبعاً مش كل المناطق فيها لكن أكيد فيه قريب منها 

بالعكس ده كمان الحكومة وفرت عربيات مجهزة ومبردة لنقل اللحوم من المجزر لأي مكان يعني الجزار مالهوش حجة مايروحش السلخانة

ثالثاً: ليه طيب الجزار مش بيروح السلخانة ؟

 سهلة جداً الإجابة 

علشان يدبح اللي هو عايزه مهما كانت حالته الصحية وكمان علشان مايتكلفش مصاريف النقل ودخول المجزر واللي مش هتوصل تمن كيلو لحمة وكمان علشان يتهرب من الضرايب والرقابة

لا ده ممكن اصلا مايكونش جزار رسمي ومش حاصل على رخصة

رابعاً: هتقولي بس الحيوان بيكون زي الفل قدامنا ومافيهوش مشاكل ؟

هقولك بمنتهى البساطة هو حضرتك طبيب بيطري علشان حكمت عليه إنه سليم ؟

ولو رديت عليا وقولتلي بس إحنا ما حصلناش حاجة من أكلها ؟

هقولك وهل أنت مستني الكارثة تحصل يعني علشان تتحرك وتمتنع عن أكل اللحوم المدبوحة خارج السلخانة ؟

طب اسمع مني بقى 

مش كل حيوان حضرتك شايفه سليم من بره يبقى سليم من جوه 

أنت عارف حضرتك إن ممكن أكتر من ٢٠٠ مرض ينتقلوا من الحيوان للانسان 

والامراض دي مش شرط تظهر فوري بالعكس ممكن تاخد سنين علشان مضاعفاتها تبان 

أنت عارف حضرتك إن العجل بيبقى داخل المجزر زي الفل وبيتنطط وممكن نلاقيه عنده سل ونضطر نعدمه فورا 

والسل ده طبعا بينتقل للانسان بمجرد حتى اللمس 

أنت عارف حضرتك بيبقى العجل داخل عادي ونكتشف بعد الدبح ان القلب مليان صديد وبيضخه لكل اجزاء الجسم وطبعا احنا بنعدمه فورا

طب خد دي كمان لما بنكشف ع اللحمة بعد الدبح ممكن نشوف نقطة بيضة داخل نسيج اللحمة دي بقى عبارة عن حويصلات ديدان بتعيش ف جسم الانسان وتأثيرها ضار جدا على صحته 

ولا الديدان الكبدية في الكبدة واللي بتظهر بعد الكشف ف السلخانة 

دي بعض الامثلة ☝️

  كل اللي ذكرته ده الجزار مش هيقولك عليه ولا هيقوم يحرق الدبيحة لو شافها 

بالعكس بشوية مياه يغسل اللحمة وكله يبقى تمام 😈

الخلاصة: خليك ف المضمون واشتري من جزار دابح تحت إشراف طبي في المجزر

وطبعاً بعد ما تخلص قرايه متنساش دعوة يوم الجمعة المبارك ولك بالمثل إن شاء الله 🤲🙏🌹

#الشبح