اللحمة بالقطعة ‼️ حقيقة ..ولا تريند 🤔

السوشيال ميديا كله كان بيتكلم عن الجزار اللي بيبيع اللحمة بالقطعة (بالجرام )  

وعلى فكرة أنا هنا لازم أحيي الجزار على ذكائه في إنه قدر يلفت الأنظار ليه ويعمل تسويق لنفسه وده شئ كويس ومن حقه طالما مش بيعمل حاجة غلط أو بيخدع الناس 👏

لكن وعلشان صفحتكم هنا من الصفحات القليلة المتخصصة في مجال اللحوم وكل ما يتعلق بيها وبتتميز بكشف كل أنواع التلاعب والغش اللي ممكن تحصل على أرض الواقع في أسواق بيع اللحوم  

والحمد لله بتنال ثقة حضراتكم في المحتوى اللي بتقدمه 

لقيت إن من واجبي  أفكر مع حضراتكم بصوت عالي ونحلل مع بعض ظاهرة جديدة ممكن تبقى موضة في بيع اللحوم ومدى نفعها للمستهلك المصري،،

في البداية : بحب أنوه إني مازلت مصر على إن أسعار اللحوم في مصر في طريقها للاستقرار وربما الانخفاض الطفيف في الأيام القليلة القادمة ☝️

نيجي بقى لموضوع بيع اللحوم بالقطعة ( ١٠٠ جرام أو حتى ٥٠ جرام )

وهتكلم فيها من جميع النواحي  

فمثلاً

👈من الناحية  الطبية الفنية 

أنت كمستهلك هتاخد قطعة لحمة صغيرة  لا باين عليها أختام  ولا تقدر تحدد جودتها وكمان مش هتعرف من أي جزء في الدبيحة  لا وكمان أصلاً أنت مش هتعرف إيه هي الدبيحة 😈

👈من الناحية التجارية :

الفكرة تبان جديدة  لكن هي أصلا مش جديدة ولا حاجة ( وده ذكاء منه) لأن حضراتكم بتلاحظو إن معظم الجزارين عندهم في محلاتهم الميزان الديجيتال ( الرقمي) ولو حضرتك محتاج أي وزن بأي سعر كل اللي على الجزار هيخزن في الميزان سعر الكيلو ( ١٠٠٠جرام) والميزان لوحده هيحسب لحد سعر الجرام الواحد  

يعني لو حضرتك دخلت لجزار وقولتله عايز لحمة ب ٥٠ جنيه  الجزار مش هيعترض لانه هيقطع بسكينته قطعة توازي مثلا ٢٠٠ جرام وهيرميها ع الميزان وهتلاقي الميزان كتب لوحده السعر ( واللي هيكون في حدود ال٥٠ جنيه برضو) وده طبعاً حسب سعر كيلو اللحمة حالياً في السوق

👈من الناحية الحرفية الفنية :😉

ودي بقى هوجه كلامي فيها للجزار وهسأله 

طب ودهون العجل اللي هي محسوبة من وزنه واللي انت المفروض مش هتحطها في حالة بيعك بالقطعة هتعمل فيها إيه وهتعوض فرق السعر الرهيب ده ازاي 

 لانك بتبيع تمن  القطعة حسب سعر كيلو اللحمة العادي ( مش الصافي) واللي طبيعي ع الاقل بيكون فيه ١٠٠ جرام دهون  

يعني لو العجل عندك ٢٠٠ كيلو  المفروض يكون منه ٢٠ كيلو دهون ودول تمنهم لوحدهم  ( ٥٦٠٠) جنيه 

قولي بقى هتعوضهم ازاي  🤔

الخلاصة : 

الفكرة مش جديدة لكن طريقة عرضها هي اللي جديدة👌

 وكمان الجزار شاطر جدآ في  اسلوب حواره  وتسويقه للفكرة وده سر نجاحه في إنه يكون تريند الأيام دي

وطالما مش بيغش الناس  أنا ماعنديش اعتراض خالص على استمراره ولو إني أشك إنه يقدر يكمل

واعتقادي إنه بس عرف يعمل دعاية لنفسه ومحله وده مش عيب ✋

وطبعا في نهاية المقال ولو استفدتوا فكرة جديدة ولو قدرت أجاوب على أسئلة كانت بتدور في أذهانكم 

 مش هفكركم بدعوة يوم الجمعة المبارك ولكم بالمثل إن شاء الله 🤲🙏🌹