ليه لازم تستلم خط وى ؟بسبب ما يلىشريحة موبايل تكافل و كرامة "
١- الشريحة مجانية يعنى بدون مقابل خالص
و طبعاً مش اى شريحة يعنى انت لو معاك شريحة كنت مشتريها قبل كده و مش تكافل و كرامة " متنفعش " لازم تستلم الشريحة الخاصة ب نظام تكافل و كرامة.
٢ - الاول كان لازم نروح السايبر و نسجل عشان نعرف نستلم الشريحة ؛ الكلام ده انتهى خلاص دلوقتى تدخلوا اى سنترال تبع شركة المصرية للاتصالات أو we بالبطاقة تستلم على طول من غير تسجيل .
٣- طب فايدتها ايه .
فايدتها دلوقتى عشان تستلم القبض بتاعك بيكون محدد ليك يوم محدد فى الشهر و مكتب بريد محدد فى محافظة محددة كمان يعنى هتلاقى المكان زحمة و زنقة و بيكون فى ناس كتير كبار سن و ذوى إعاقة ، هنا بقى جت فكرة الشريحة .
أزاى بقى الحل فالشريحة ؟!
لما وزارة التضامن الاجتماعى تبدأ تفعل نظام الشريحة القبض هينزل على " محفظة we pay " الشريحة و المستفيد أو اللى بيقبض القبض يقدر يستلم القبض بتاعه فى اى يوم فالشهر و كمان من اى مكتب بريد أو أى سنترال أو أى ماكينة صراف ألى " ATM " تبع اى بنك
و كمان يقدر ميسحبش الفلوس نقدى و يدفع بيها فواتيره سواء كهربا مياه غاز موبايل او أى فاتورة هو عايزها .
٤ - طب اقدر استلم الشريحة امتى ؟
فى اى وقت موجودة فى السنترالات الكبيرة - مش الفروع الصغيرة - بتاعة المصرية للاتصالات أو we فاتحة فيه .
٥ - طب مين يقدر يستلم الشريحة ؟
طبعاً كل مستفيد تكافل أو كرامة ليه شريحة واحدة ، و اللى يقدر يستلمها المستفيد نفسه أو لو هو قاصر أو صاحب إعاقة ممكن يستلمها عنه أبوه أو أمه أو أخوه أو أخته اى حد يكون هو المسؤول عنه فى موضوع قبض تكافل و كرامة .
طب انا أم وليا قبض تكافل أو كرامة و بردو عندى طفلين قُصر ل لفسه صغيرين معهمش بطاقة رقم قومى و ليهم قبض كرامة ؛ عادى جدا ليكى انك تستلمى على بطاقتك ال ٣ شرايح عادى بس حاليا كل اسره لها شريحه واحدة
ياعنى حضرتك بتروحى تستلمى لنفسك ببطاقة الرقم القومى بتاعتك بس ، انما لو بتستلمى لأطفالك يبقى لازم يكون معاكى بطاقة الرقم القومى و أصل أو صورة واضحة جدا من شهادة ميلاد أطفالك دول .
حاجة كمان مهمة جداً بطاقة الرقم القومى لازم تكون :
# الأصل
# سارية مش منتهية
# سليمة مش مكسورة أو متنية
٦ - طب هى الشريحة دى فيها رصيد ؟
اه طبعا فيها باقة بتنزل كل شهر ايه الباقة دى بقى :
الباقة دى بتتحاسب بالثوانى مش بالدقايق عشان
تكون " موفرة جدا "
ثوانى الإتصال على ٠١٥ = ١٥٠٠ ثانية
رسايل للإسال على ٠١٥ = ١٥ رسالة
انترنت عالموبايل = ١٠٠ ميجا نت
و طبعاً تقدروا تكلموا و تبعتوا رسائل للشبكات التانية غير ٠١٥ بس تشحنوا رصيد الاول .
٧- طب هو انا لو مشحنتش الخط عادى ؟
لا طبعاً ،
مهم جدااا جدااا لازم لما تستلم الخط تركبه فى اى موبايل و تتصل على خدمة عملاء شركة we اللى هما ١١١ هيسألوك على اسمك و رقم بطاقتك ال ١٤ رقم ف هيفعلولك الشريحة و تنزل عليها الباقة و كل ٣ شهور تشحن الخط ب ١٠ جنيه على الأقل و تستخدمه و تعمل منه مكالمة على الأقل كل شهر .
الخلاصة :
استلموا الشريحة و ركبوها فى اى موبايل حتى لو كان موبايل أولادكم و اتصلوا على ال ١١١ و فعلوها و بعد ما تفعلوها ... لو لسه موجودين فالسنترال اطلبوا من اى موظف يعملك عالشريحة المحفظة الإلكترونية " we pay " و لو الموبايل بتاعك حديث و تاتش نزل برنامج المحفظة " we pay " لو مشيت من السنترال تقدر بعد ما تفعل الشريحة تروح السنترال فى اى وقت و تطلب منهم يشتركوا لك فى المحفظة الإلكترونية " we pay "
و بعد ده كله و متنسوش تبلغوا مكتب التضامن الاجتماعى اللى انتم تابعين ليه بإنكم استلمتم الخط و رقمه ايه كمان عشان يسجلوه عندهم و تبقوا تشحنوا الخط كل ٣ شهور ب ال ١٠
وفى حالة وجود اى مشاكل عند الاستلام ارجو التواصل لحل اى مشكله خاصه بخطوط we
تعليقات
إرسال تعليق